x

На Урядї Пряшівского самосправного краю буде робити порадця про соціално вылучены комуніты.

00

Міланови Маєрскому, председови Пряшівского самосправного краю буде у сферї соціално вылученых комуніт помыгати порадця про тоту сферу. Новый пост буде на Урядї заставати Роберт Нойпауер, котрый має скушености з терену, в першім шорі з ромской осады в селї Крижова Вес. Головныма пріорітами Нойпауера буде підпора соціалной зміны, підвышованя якости середнёшкольской освіты, рост заместнаности людей із соціално вылученых комуніт. Нойпауер бы рад ініціовав пілотный проєкт на середнїх школах заміряный на підпору професій вгодных про Ромів, котры бы ся так лїпше знали уплатнити на торгу роботы. „Тым, же єм чоловік з терену, віджу важность каждоденной роботы в комунітах. Край може вытваряти простор, жебы ся інформації з терену посували на уровень сільской і крайской самосправы і мімовладного сектора. Моёв задачов буде вытваряти підпорну сіть про людей, котры роблять в тых комунітах. Кедь будуть выголошены конкретны проєкты в области навчаня і заместнаности, до котрых ся буде мочі запоїти Пряшівскый самосправный край, рады так зробиме,‟ увів Нойпауер