x

Кіска і Фіцо в рамках ослав выроча СНП мали остры выступы

00

Нашов повинностьов є зробити вецей, як лем собі єден день в року припомянути одвагу предків і положыти квіткы к памятникам павшым. Передовшыткым в часі, кедь ся по нашіх державі безочливо розтігують погробкове націстічной і фашістічной ідеолоґії. Повів то вчера у своїм выступліню в рамках централных ослав 73. выроча Словацького народного повстаня в Банскій Быстриці презідент Словацькой републикы Андрей Кіска перед заповненым ареалом Памятника Словацького народного повстаня. Окрім іншого ші повів, “А ту в Банскій Быстриці може найбівше указали, же діла общі справовати незнають. Але зато як правдивы слабосі докажуть знеужывати міць, абы застрашували учителів на школах ці шікановали акторів малого охотницького театру“, повів Кіска.
І премєр-міністер словацькой влады Роберт Фіцо в рамках цілонародных ослав конштатовав у своїм выступі, же є ненормальне, же по 73 рокох од Словацького народного повстаня, од добы, кедь сме выгнали “нацков“, є недалеко памятника Словацького народного повстаня будинок, де собі говорять “На сторож“ а мы ся на то позераме, як бы то было в порядку. Далі публічно вызвав орґаны чінны в трестнім конаню, абы на тоты проявы реаґували так барз, як ся дасть, бо є то злочін. За його словами є Словакія єднов з наслободнішых і найдемократичнішых держав аж до такой міры, же сі каждый робить што хоче, без хоцьякой міры зодповідности.
(Петро Кімак – Фейко)