x

Лайчака буде заступати державный секретарь

00

Почась неприсутности міністра загранічных діл Словацькой републікы Мірослава Лайчака із причіны выконованя функції председы 72-ой Валной громады Орґанізації зъєдиненых народів в Ню Йорку го заступать державный секретарь резорту діпломації Іван Корчок. „Сиділи сьме над тым цілы годины і наставили модел, жебы было ясно, же не выникне жаден вакуум,“ повів Лайчак. Єдночасно уточнив, же мають точно розділено, о котрых справах буде вырішовати державный секретарь у своїй компетенції, о котрых буде радити ся із міністром і о котрых буде вырішовати лем сам міністер. Шефа словацькой діпломації до функції председы выбрали представителі членьскых держав Орґанізації зъєдиненых народів 31-го мая. Представитель Словакї здобыв таку высоку функцію в сістемі орґанізації по першый раз обще.
(Петро Медвідь)