Роберт Фіцо в четвер скінчів у фунції председу влады Словацькой републикы. Свою демісію передав до рук презідента Андрія Кіску. Абдікацію подала і ёго влада, но міністры будуть выконовати свою функцію аж до менованя нового кабінету. Фіцо ся розгоднув абдіковати по двойтыжднёвій владній крізї, котру выкликала вражда новінаря Яна Куцьяка і ёго партнеркы Мартіны Кушнїровой. Фіцо дав к свому одходу три условія: жебы новый премєр быв номінованый партіов Smer-SD, жебы презідент решпектовав выслїдкы парламентных волеб з року 2016 і жебы решпектовав сучасну коалічну змлуву. Поверїня на зоставлїня нового кабінету собі од презідента Андрія Кіску перевзяв віцепремєр про інвестіції Петер Пеллеґріні. Тот уже презідентови принїс 79 підписів посланцїв, котры новый кабінет підпорять. Бывшый премєр, як сам повів, хоче быти як председа Smeru-SD актівный в політічнім жывотї, хоче ґарантовати ясну проевропску орєнтацію штату. Як повів: „Номінація Петра Пеллеґрінія є найприроднїша вец. Петер Пеллеґріні є інтеґрално звязаный з партіёв SMER-SD од року 2000. Заставав вызначны позіції, быв міністром, штатным таёмником, председом народной рады, теперь підпредседом влады. Є бытостно спятый із SMER-SD. Яка буде моя задача? Моя задача буде тримати хырбет новому председови влады. Моёв задачов як председу SMER-SD буде, жебы єм тиснув на тоты пріоріты, котры суть важны про партію SMER-SD. То є парламентна демокрація, котра є поставлена на прінціпі політічных партій“.
(TASR)

Фото: TASR/ M. Baumann