x

Самосправны краї о реґіоналнім членіню і заводжованю реґіоналных значок

00

У четверь ся в Нїтрі зышли представителї самосправных країв, жебы попробовали скоордіновати свої актівіты коло заводжованя реґіоналных значок але заєдно з тым хотять вырїшити неясности навколо реґіоналного членіня Словакії. Як пояснює председа Комісії реґіоналного розвоя і уземного планованя в Нїтряньскім самосрпавнім краю Даньєл Балко: „Кедь собі днесь чоловік выглядать на інтернетї реґіоналне дїлїня Словакії, так ся му зобразить вісем і девять сорт різных карт з різныма членінями Словакії. А тото є тот основный проблем, затоже ту не йде лем о то, же многы штатны інштітуції собі вытваряють окремы реґіоналны дїлїня. Проблем є тот, же кедь уж так ся стрїтите з тым, же реґіон Гонт єдно штатне дїлїня не знає а друге го назве цалком інакше, так з тым уже проблем є, бо як потім має фунґовати реґіонална значка, кебы немогла называти свої выробкы подля своёй назвы. Таже тото є тот першый крок – зъєднотити реґіоналне дїлїня.‟ Як Балко припомянув, при заводжованю реґіоналных значок буде треба і сполупрацу і комунікацію з громадов, містныма акчным ґрупами і самосправов. Є важне, жебы ся вшыткы знали згоднути і жебы не пришло ід сітуації, коли собі каждый некоордіновано буде вытваряти множство мікрозначок намісто силных реґіоналных означінь, якы мають опору в традічных назвах теріторій. Представителї самосправных країх ся хотять по нїтряньскім стрїтнутю сходити і в будучности а взаємно рїшати коордінацію при будованю реґіоналных означінь. „Добісїдовали сьме ся, же до місяця каждый край пошле свою представу о дїлїню свого реґіону. Так ся вытворить перша мапа, о котрій будеме діскутовати і котра буде основов на вытворїня тиску на зєдночіня дїлїня Словакії на реґіоны. Другым кроком буде, же собі зоставиме список найбівшых проблемів, котрыма ся поступно зачнеме довєдна занимати. Наше найблише стрїтнутя бы ся мало одбыти в септембру,‟ додав Балко.
(TASR, Цітрякова)