Словеньско здобуде од Европской унії 3 міліоны евр на підпору зеленины і молока на школах. Проґрам є платный од днешнього дня, значіть 1-го авґуста і буде ся реалізовати в цілій Унії oд першого дня школьского рока 2017/2018. Цільом нового проґраму, котрый злучів довєдна два попередні – проґрам на підпору конзумації овоцины і зеленины і конзумації молока – до єдного правного рамка, є підпорити у дітей здравы звыкы. В практіці то значіть, же школярі дістануть свіжу овоцину, зеленину і молоко, але так само і выробкы з тых продуктів.
(Анна Кузмякова)