Наряджіня стягнути із словацького торугу лїкы з учіннов латков валсартан выдав Штатный інштітут про контролу лїків. Прічінов є підозріня на притомность недекларованой нечістоты в учінній латцї. Розгоднутя ся дотулять вшыткых шаржі лїків Вапресс, Валзап, Валсартан Актавіс, якы ся поужывають на лїчіня высокого кровного тиску, сімптоматічной сердцёвой недостаточности і на лїчіня по недавнім сердцёвім інфарктї. Штатный інштітут інформує, же „паціентам, котры тоты лїкы ужывають не грозить акутне різіко, зато не допоручує перервати лїчіня. Є треба, жебы тоты паціенты найпізнїше до єдного місяця навщівили свого дохтора, котрый їм насадить іншы лїкы.‟ Лїкы ся стїгують на цїлоевропскій уровни а на рїшаню той проблемы робить Европска лїкова аґентура і Европскый ведучій уряд про якость лїків. Уряд буде в далшых днёх перевіряти і далшы лїкы з латков власартан, але і лїкы, котры обсягують іншы сартаны з подобнов хемічнов штруктуров.
(TASR)