На Словакії ся од року 2001 припоминать 17. новембер як День боя за слободу і демокрацію. Посланцї Народной рады на Словакії розгодли схвалїнём закона, же 17. новембер буде штатным святом СР.  Датум ся споює і з Міджінародным днём штудентства. Одпор проти тоталітарній моци в часї другой світовой войны собі 17. новембра припоминають штуденты скоро всягде у світї. Міджінародный день штудентства выголосив в Лондонї Міджінародный союз штудентсва в роцї 1941 на маніфестації солідаріты з чеськыма штудентами, як спомінку на започатя фашістічного терору проти чеськым высокым школам а їх штудентам в роцї 1939. Подобно як в роцї 1939 і в новембру 1989 зограли главно в Празї і Братїславі вызначну роль штуденты высокых школ. Стали ся каталізаторами вшыткых пізнїше слїдуючіх змін. Подїям зо 17. новембра  1989, кідь ся штудентскыма демонштраціями зачала Револуція, передходили нелеґалны стрїтнутя штудентів в Празї і Братїславі. Поступно подїї на підпору штудентів і на выражіня одпору проти соціалістічному зряджіню набыли векшый розмах аж выустили до паду режіму.
(Зденка Цітрякова)