Председа Пряшівского самосправного края Мілан Маєрскый і ректор Пяшівской універзіты Петер Коня вчера підписали Меморандум о співпрацї меджі Пряшівскым самосправным краём і Пряшівсков універзітов. Цїлём Меморанда є розвиток актівіт в области школьства, реґіоналной і народной културы, сполочного жывота і меджінародной співпрацы. Дакотры цїлї, конкретно выбудованя атлетічного штадіона, были подля слов Мілана Маєрского уж наповнены. „Дакотры інштітуції найперше підпишуть меморандум а потім ся го намыгають якымесь способом наповнити. Мы сьме собі зволили опачный тренд. Найперше сьме уже наповнили дакотры цїлї співпрацї. Конкретно выставба атлетічного штадіона, але самособов тых цїлїв, і кедь може не так інвестічно нарочных, але довгодобых, є веце,‟ повів по підписї меморандума председа Пряшівского самосправного краю. Высловив ся, же ім іде головно о то, жебы стабілізація в краю абсолвентів Пряшівской універзіты была ясна. Перспктівнов областёв подля нёго є співпраца меджі факултамі ПУ і краём в одношіню ід середнїм школам, реалізація одборных практік штудентів, орґанізованя семінарів, враховано лїтнёй універзіты. Ректор Пряшівской універзіты Петер Коня доповнив, же „можностей є дуже много, залежить, самособов, од профілу нашых факулт, од языків, через історію, манажмент, турістічный рух, еколоґію і далшых можностей співпрацї, де можеме быти проспішны краю а, самособов, проспішный край нам. Наісто великый потенціал є і в середнїх школах, котры суть в пособности Пряшівского самосправного краю. Суть ту далшы формы сполупрацї, ці уже при рїшіню проєктів і подобні, де уже дотеперь кооперація екзістує і є доста успішна.‟
(TASR, Цітрякова)