В суботу будуть мочі волічі в Пряшівскім краю выберати до орґанів высшых уземный цїлків председу самосправного краю з 11 кандідатів а тоже 62 посланцїв з 500 кандідатів. Єден з кандідатів на председу ся кандідатуры розгоднув вздати а офіціално то комісії ознамив у вівторок пополідне. В суботняйшых вольбах ся до пряшівской крайской самостравы буде волити в 13-ох волебных обводах, котры копірують окремы окресы. Заступітельство Пряшівского самосправного краю буде мати і в далшім волебнім періодї 62 посланцїв. Найвекше чісло посланцїв, т. з. 12, буде мати уже традічно окрес Пряшів. З окресу Попрад буде вісем посланцїв. Шістьчленне заступіня будуть мати окресы Бардеёв і Воронів над Топлёв, по пять посланцїв окресы Гуменне і Кежмарок. Чотырёх заступців будуть мати окресы Стара Любовня і Сабінов, трёх посланцїв Левоча, Снина і Свідник. Двоме посланцї будуть заступовати окрес Стропків а Міджілабірцї будуть в тім волебнім періодї мати лем єдного заступцю. Председів самосправных країв собі жытелї на роздїл од минулости будуть выберати в єдноколовій вольбі.
(Зденка Цітрякова)