В Любовняньскім сканзені під замком прибыли улі про пчолы і сад. Выникнув там Центер школованя молодых пчолярів. „Центер школованя сьме вытворили про нашых молодых навщівників, школярів основных, а і середніх школ, жебы ся познакомили з проблематіков пчолярьства як єднов із можливостей, што робити у вольнім часі,“ повів про словацькый денник Korzár справця сканзену Душан Яніцькый. За помочі пчолярів із Старой Любовні планують орґанізовати різны воркшопы, вказованя як вытачати мед і вытапляти віск. Проєкт на збудованя того центру в сканзені подали зачатком того рока в співпраці із Базовов орґанізаційов Словацького союзу пчолярів у Старій Любовні, помогла і фундація Екополіс в рамках ґрантового проґраму Зелены оазы.
(Петро Медвідь)