Пріматор Снины Штефан Міловчік не підписав узнесіня, котрым депутаты містьского заступительства схвалили замір перебудовати нехоснованы неквартельовы просторы на Коменьского уліці на арендовы квартелі. План брав Міловчік за різіковый і про місто невыгодный. За пропозіцію депутаткы Марії Тодаковой на выбудованя квартелів голосовало вісем із 14-ох депутатів. Матеріал ся до містьского парламенту дістав знова у четверь. На то, жебы переломити вето пріматора, требало на засіданю, жебы за пропозіцію голосовало 11 депутатів. Но то ся не стало. За выбудованя квартелів было знова лем вісем голосів, і так натеперь жадны арендовы квартелі в Снині не выникнуть.
(Петро Медвідь)