Днесь на святого Валентіна в многых шпыталях зачала Валентіньска капка кырви. До акції ся залучів і шпыталь Світ здравя у Свіднику в співпраці із Словацькым Червеным крестом. Вшыткы, хто мать інтерес даровати кров, можуть прийти на гематолоґічно-трансфузіолоґічне одділіня свідницького шпыталя, а то в часі од шестой до півдевятой годины. Акція потриме до шістнадцятого марца, одберовы дні будуть кажду середу. Даровати кров може каждый здравый чоловік од вісемнадцять до шістьдесят років, котрый важыть над пятьдесят кілоґрамів. Хлопи можуть даровати кров найвеце штири раз до рока, жены три раз до рока. Кров потребують тяжко хворы, матери по комплікованім породі або паціенты перед тяжков операційов.
(А.Кузмякова)