x

Кохановцї в Гуменьскім окресї планують выставбу наёмных бітів

00

В сучасности Кохановцї чекають на колавдацію крижоваткы, яку ся валал розгоднув цїлково переставляти, выбудовати новы автобусовы заставкы і приступовы ходникы і перепоїти переход про ходцїв з железнічным наступіщом. Село роздїлює штатна дорога в смерї на Міджілабірцї. З єдного боку є валал заставляный хыжами а уже ту не є веце ставебных фундошів. З другого боку ся находить рїка Лаборец а за нёв шпортовы гріска, котры жытелї навщівують. Зато потребовали вырїшыти беспечность жытелїв, конштатовав староста Кохановец Мірослав Порохнавый. Далшым розвоёвым планом села є выбудованя наёмных бітів, котре бы ся мало зачати уже на ярь будучого рока. Допіт по фундошах в селї є великый, до матерьской школы ту ходить коло 17 дїтей, причім дакотры доходять з Гуменного. І вздаленость до Гуменного не є велика. Зато староста хоче поставити новы наёмны біты главно про молодых людей, котры бы так могли зістати жыти в селї а не мусїли ся стяговати до міст. Валал має докінця приготовленый проєкт на выбудованя парку арборетового тіпу попри рїцї Лаборец. Фінанції хотять здобыти з еврофондів. Інформацію принїс справодайскый портал Humenné 24.
(Зденка Цітрякова)