Меджілабірці планують выбудовати ледову плоху. Сполуфінанцовати бы то мав Пряшівскый самосправный край, котрый бы мав дати на проєкт 100 тісяч евр. Решту, приблизно 200 тісяч, бы самосправа заплатила сама. Причінов такой інвестіції до шпортового ареалу є факт, же в місті бракує простор про дітей і шыроку верейность на вольночасовы актівности в зимі. Плоха бы мала быти в ареалі містьского шпортового клубу. В будучности, подля слов пріматора міста Владіслава Вішньовского, бы хотіли ледову плоху дати і під стріху, жебы погода не мала вплив на якость леду. Крайскы депутаты будуть о тім, ці інвестіцію до Меджілаборець край дасть, рішыти на засіданю у віторок, 22-го авґуста.
(Петро Медвідь)