Русиньска оброда на Словеньску приготовила дваденну подію на тему Высельованя Русинів. Його перша часть у формі семінара ся одбуде днесь 14-го септембра о 17-ій годині в Піддукляньскій бібліотеці у Свіднику, де із лекціями на дану тему выступлять професор Йозеф Сіпко із Пряшівской універзіты і Штефан Крушко, автор публікацій із переселенецьков тематіков.  У пятніцю 15-го септембра буде подія продовжовати о 16-ій годині в Домі културы в Цернині. Окрем лекції на дану тему, з котров выступить Олґа Ґлосікова, директорка Музею русиньской културы з Пряшова, ту буде бісіда із прямыма учестниками – переселецями. Співом проґрам обогатить і ґрупа Шамбрінці зо Шамброна.
(Петро Кімак-фейко)