У Вігорлатьскых верьхах, в части званій Поперечный,  одкрыли новый турістічный ходник довгый коло 13 кілометрів. Ходник зачінать у селі Підгородь, веде через лом Бенятина, замок Старый Конюш і кінчіть в селі Конюш. Цільом одкрытя ходника є росшырити турістічну путь про навщівників того реґіону, спропаґовати історію сел на выході Словакії коло шенґеньской граніці і указати на значіня захраны славяньской културной дідовизны, до котрой належать і нашы деревяны храмы. Єден з них ся находить в селі Руська Быстра, котрый є записаный в Списку світовой дідовизны UNESCO.
(Петро Кімак-Фейко)