В Пряшові днесь одкрыли памятну таблу вызначному світовому фізікови русиньского походжіня – Діонізови Ільковічови. Памятна табла была одкрыта на будові Педаґоґічной і соціалной академії. Професор Діоніз Ільковіч народив ся 18-го януара 1907-го року у Шарішскым Щавнику. Його брат, Алексій Ільковіч, быв вызначным русиньскым журналістом. Ільковіч быв науковцьом світового мена, співосновав Словацьку академію наук, быв деканом Факулты природных наук в Братіславі. Штудовав в Чехословакії, но і у французькім Паріжу. Быв великаном, котрый пояснив вынятковый природный яв і дефіновав го як Закон полароґрафії. Тот закон увів і до жывота. Окрім іншого стояв при зроджіню трьох основных фізікалных інштітутів на Словакії: Інштітуту технічной фізікы Словацькой высокой школы технічной,Фізікалного інштітуту Природознавчой факулты Словацькой універзіты і Фізікалного інштітуту Словацькой академії наук. Із тых інштітуцій ся практічно вывинулы вшыткы далшы фізікалны інштітуції на Словакії. Діоніз Ільковіч по плоднім професіоналнім жывоті умер 3-го авґуста 1980-го року.
(Петро Медвідь)