У сниньскім Домі културы проходила в суботу святочна академія, котра была завершіньом тогорічных ослав сімстой річніці од першого писомного документу о місті. Самосправа на ній оцінила вызначны особности міста і уділила три ціны міста, три ціны пріматора і дакілько дяковных листів. Меджі оціненыма были і знамы ґалерісты, братя Міро і Андрій Смолаковы, котры походжають із днесь уж затопленого села Старина. Прославила їх умелецька творчость, многы інтересны події і проєкты. Смолаковці суть основателями знамых ґалерій в Берліні, Празі, Братіславі і в Снині. Сниньска ґалерія єствує уж 25 років і є орґанізатором Meджінародного малярьского фестівалу, нa котрім мальовало уж высше 500 умелців із 57 країн вшыткых контінентів.
(Петро Кімак-Фейко)