По закінчіню німецького спору односно азіловой політікы і плановане зряджованя транзітных центрів на граніці з Австрійов приготовлює австрійска влада крокы на охорону своїх южных граніць. Подля аґентуры APA то у віторок довєдна выголосили австрійскый канцеларь Себастіан Курц, віцеканцеларь Гайнц-Хрістіан Страхе і міністер внутрішніх справ Герберт Кікл. Німецька влада была в понедільок согласна зо зряджіньом тзв. транзітных зон на граніці з Австрійов, одкыль будуть вертаны міґранты реґістрованы інде в Европскій унії. В запертых центрах в Баварії бы мали быти уміщены жадателі о азіл, котрых жадости будуть посуджованы в ускоренім процесі. МІґранты не будуть годны одыйти з транзітных зон аж до кінця процесу. Австрія в реакції на тот договор очекує скоре поясніня позіції німецькой влады. Влада у Відню є подля Курца, Страхего і Кікла приготовлена на вшыткы сценарі.
(TASR, Медвідь)