Америцькый віцепрезідент Майк Пенс знова одложыв свою довго очековану навщіву Ізраіля. В понедільок о тім інформовало ізраільске Міністерство загранічных діл. Країну мав навщівити вже минулый місяць, но офіціалнов причінов одложіня робочой пути было голосованя о даньовій реформі в америцькім Сенаті. Одложіня слідовало так само по тім, што на Близкім выході было чути волну неспокойности, яка была выкликана рішаньом презідента Доналда Трампа признати Єрусалим за головне місто Ізраіля, припомянула аґентура Associated Press. Втогды Білый дім інформовав, же Пенс прийде на навщіву жыдівской державы по 14-ім януарі. Пенс ся на своїй робочій пути мав наперед заставити в метрополі Егіпету, де ся мав стрітити з презідентом Абдалом Фатагом Сісім. Пак мав Пенс іти до Єрусалима, де мала проходити стріча з премєром Беняміном Нетанягу, і так само там мав выступити з проявом в парламенті.
(Петро Медвідь)