Наперек тому, же Европска унія не є согласна, днесь о 6.00 год. середньоевропского часу вступили до платности обновлены санкції америцького презідента односно Ірану. Презідент Споєных штатів Америкы обвинює Тегеран із підтримованя терорізма, ґвалту і хаосу. Єдночано Трамп апеловав на вшыткы остатні державы, жебы ся придали ку сакнціям і економічно Іран ізоловали. Европска унія не є согласна і хоче европскы компанії хоронити, інформовала аґентура DPA. Унія бы хотіла сохранити і ключовый нуклеарный договор з Іраном, од котрого Споєны штаты одступили минувшый рік. Санкції были односно Тегерану зрушены як раз на основі того договору, котрый быв підписаный меджі Іраном і світовыма державами у 2015-і році, і од котрого Трамп єдносторонно одступив з тым, же договор не ґарантовав забороніня Ірану в будованю нуклеарной зброї.
(Медвідь, TASR)