x

Курц буде новым шефом австрійской влады

00

В неділю в Австрії проходили передчасны парламентны выборы. Новым шефом австрійской влады бы ся мав стати лем 31-річный дотеперішній шеф діпломації Себастіан Курц. Подля іщі неофіціалных резултатів його людовці здобыли в неділю 31,7 процента голосів. На другім місці бы мали скінчіти соціалісты Хрістіана Керна із 27-ма процентами, і третє місце бы мало належати правіцьовым радікалам – Свободній партії Австрії під веджіньом Ганса-Хрістіана Страхего. Аналітіці говорять, же з найвекшов правдоподібностьов соціалісты, котры дотеперь владли із людовцями в коаліції, яка не вытримала цілый функчный період, будуть хотіти іти до опозіції. Наймолодшый повойновый шеф влады Курзц так може мати дві можливости – волебный пат і меншынова влада, або споїня ся в коаліції із радікалныма свободныма. Тоты вже раз были в коаліції в 90-ых роках. Втогды за то Австрія дістала од Европской унії санкції.
(Петро Медвідь)