До Будапешті в неділю прилетів кітайскый премєр Лі Кхе-чхіанґ, котрый там абсолвує саміт 16+1, што є здружіня країн середньой і выходной Европы, Балкану і Кітаю. Головнов темов буде кітайскый проєкт Новой Гадвабной пути, в рамках котрого планує Кітай з великой части фінанцовати обновліня або будованя драг, желізніць і приставів на дакілько трасах міджі Европов і Кітайом. До ґрупы держав 16+1 належать окрім Кітаю Албанія, Боснія і Герцеґовина, Булгарія, Чеська републіка, Чорна Гора, Естонія, Хорватія, Літва, Латвія, Македонія, Мадярьско, Польща, Румунія, Словакія, Словенія і Сербія. Крітіци звертають увагу, же Новов Гадвабнов путьов собі Кітай в Европі зміцнює вплив.
(Петро Медвідь)