Румуньско-мадярьска співпраца в обасти енерґетічной безпечности може принести історічный проґрес, повів у понедільок в Букурешті мадярьскый міністер загранічных діл Петер Шіярто по стрічі зо шефом румуньской діпломації Теодором Мелесцаном. Подля мадярьской аґентуры MTI міністры договорили ся, же Румунія до року 2020 вытворить технічны обставины експорту ґазу напрямом до Мадярьска. Капаціта того ґазоводу про ґаз здобываный із области Чорного моря буде годна по році 2022 за рік досягнути 4,4 міліарды метрів кубічных. „Іде о першу нагоду за попередніх дакілько десятьліть, коли Мадярьско має можливость у великім множестві накуповати земный ґаз з новых джерел, котры ся не вяжуть ку Росії,“ повів мадярьскый міністер.