Меркелова подля анкет телевізій ARD i ZDF выграла в неділнім телевізнім дуелі над своїм головным протикандідатом Мартіном Шулцом із соціално-демократічной SPD. В анкеті телевізії ARD аж 55 процент респондентів дало за вітязя Меркелову. Лем 35 процент спринимало Шулца за пересвідчівішого, 10 процент людей не знало одповісти. Другый німецькый телевізный канал мав тіснішы резултаты, но і за тыма выграла Меркелова. Подля аґентуры DPA Мартін Шулц в діскузії потвердив, же має добры речницькы способности і Меркелову веце раз загнав до кута. Його тон не быв аґресівный, но выкликав почутя фаховости. Хрістіаньска коаліція Меркеловой довгодобо веде в анкетах перед парламентныма выборами, якы будуть в Німецьку тот місяць. Подля вшыткого ся так Анґела Меркелова стане канцеларьков по четвертый раз.
(Петро Медвідь)