Односины Россії і Турції суть знова в старых коляях, выголосив россійскый презідент Владімір Путін на зачаток стрічі с турецькым партнером Рецепом Ердоґаном в югороссійскім місті Сочі. Їх стріча ся мать дотуляти на сітуацію в Сірії. “Хочу уж на початку нашой стрічі підкреслити, же нашы односины є можне поважувати практічно за цілком направены“ повів Путін в презіденскій резіденції в Сочі. Минулы силны економічны односины меджі обома державами были важно нарушены кінцьом 2015 рока, кедь турецька стігачка зострілила на сірскій границі россійске воєнске летадло. Минулого року взаємный обход Россії с Турційов понижив ся о 30 процентів, але за першых девять місяців того року ся знову побівшив о 38 процентів, повів Путін. Одночасно додав, же од даной стрічі с Ердоґаном очікує передовшыткым з концетрувати ся на снажіня закінчити сірскый конфлікт.
(Петро Кімак-Фейко)