Aмeрицькый презідент Доналд Трамп підписав пропозіцію закона о новых санкціях проти Росії, Северній Кореі і Iрану, oбсягуючій і тверды фінанчны реґресы в одношіню до Moсквы. Пропозіцію закона, котру схвалили oбидві коморы Конґресу, підписав Трамп і наперек тому, же му выразно скомплікує зміріня санкцій проти Росії. В минулости Трамп нераз твердив, же Moсква не засяговала до америцькых минулорічных презідентьскых волеб і назначів охоту співпрацовати з Російов. Росія на новы санкції реаґовала інформаційов, же з америцькых заступительскых урядів в Росії буде мусити одыйти 755 робітників. Америцькы санкції подля Медведєва змарили надію на зліпшіня взаємных контактів. Руськый премєр означів Трампову позіцію за слабодуху.
Реакція на америцькы санкції приходить і з Северной Кореі. Америчане будуть од септембра потребовати окреме поволіня, котре будуть выдавати лем в ограніченій кількости. Жытелі США, котры ся находять в країні, мусять з ньой до кінця авґуста одыйти.
Eвропска унія затля не реаґує на новы aмерицькы санкції проти Росії. Но покы тоты санкції пошкодять економічны інтересы Унії, буде Споєным штатам одповідати таков самов позіціов, повів председа Eвропской комісії Жан-Клод Юнкер.
(Анна Кузмякова)