Головный конкурент німецькой канцеларькы Анґелы Меркеловой в септембровых парламентных выборах Мартін Шулц є пересвідченый, же єй може вычеряти у функції, наперек тому, же анкеты публічного мніня давають омного векшы процента коаліції CDU-CSU, котру веде сучасна канцеларька. Шулц, котрый быв до януара председом Европского парламенту, про німецьку телевізію ZDF повів, же собі думать, же іщі все має добру шансу вести будучу владу. Анкеты давають соціалістам, котрых лідром є Шулц коло 24 процент, хрістіаньскы демократы мають підпору коло 40 процент опрошеных людей. Соціаліста Шулц зачав свою кампань уж перед дакілько тыжднями. Анґела Меркелова лем тот вікенд, причім повіла, же міцна Европска унія значіть міцне Німецько і так само підкреслила, же міґрачна кріза, яка ту была, коли до Німецька пришло коло міліона людей, ся вже не сміє повторяти.
(Петро Медвідь)