Йорданьскый міністер загранічных діл остерігав США перед „небезпечныма наслідками“ в припаді признаня Єрусалима за головне місто Ізраіля. Айман ас-Сададі повів америцькому колеґови Рексови Тіллерсонови, же споминане выголошіня спустить великый гнів в арабскім і музульманьскім світі. Палестіньскый презідент Магмуд Аббас вже діскутовав о тій темі з вецеро представителями іншых держав. Пожадав їх, жебы пересвідчіли америцького презідента Доналда Трампа, най Єрусалим не выголошує за головне місто. Шатут Єрусалима є чутливов справов, кідьже собі на нього роблять претензії як Палестіна так і Ізраіль. Палестіна хоче, жебы Єрусалим, котрый быв обсадженый Ізраільом в році 1967, быв головным містом будучого палестіньского штату. Офіціално міджінародно признаным головным містом жыдівской державы, наперек намагам Ізраіля, є дотеперь Тел Авів.
(Петро Медвідь)