По піврочній перерві зачне зась ходити автовлак меджі Прагов і выходом Словакії. Першый тогорічный спой выразить з чеського головного міста 1.юла. TASR о тім інформовав говорця Чеськых драг (ЧД) Філіп Медельскый. Лінка была на дакілько місяцїв перерушена з доводу стягованя пражського терміналу з головной станіцї Прага юг в штвыртї Міхле, пише справодайкыня TASR в Празї. ,,Служба автовлак ся вертать по вынученій приближно піврочній перерві а мы так в кооперації зо словацькыма колеґами можеме зась нашым путуючім понукнути комфортный способ путованя ку нашым найблизшым сусідом. Стачіть вечур наложыти свій мотор або моторку, через ніч ся комфортно выспати в ложковім ваґонї а рано оддыхнутый выразити спознавати красы Словакії,” повів наместник ґенералного директора ЧД Йіжі Єшета. Автовлак путуючіх тот рік завезе до станіць Попрад-Татры і Кошіцї. Станіца Гуменне не буде з доводу продовжуючой вылукы обслугована, лінка бы ся до нєй мала подля ЧД вернути будучій рік.

(TASR, Шутіова)