В понедільок 27-го януара 2025-го року в просторах владного готела Bôrik в Братіславі одбыло ся установлююче – 1-ше засіданя Рады влады Словацькой републікы про народностны меншыны. Рада офіціално выникла на основі рішіня словацькой влады із 30-го октобра минувшого року, і вычеряла так довтогдышній Выбор про народностны меншыны і етнічны ґрупы, котрый належав під Раду влады Словацькой републікы про людьскы права, народностны меншыны і родову рівность. Народностны меншыны, котры суть офіціално вызнаны Словацьков републіков, тым здобыли орґан із высшым статусом, і їх аґенда ся одділила од аґенды людьскых прав і родовой рівности. За Палату народностных меншын Рады влады Словацькой републікы на установлюючім засіданю были участны кооптованы членове із бывшого меншынового выбору. За Русинів, котры мали трьох членів народностного выбору і теперь мають трьох членів Рады, брали участь Мартін Караш, Петро Медвідь і Мілан Ян Піліп. Засіданя одкрыв премєр Словацькой републікы Роберт Фіцо. Подля шатуту Рады, котрый быв схваленый владным кабінетом, якраз міністерьскый председа є і председом того меншыного орґану. Премєр такой на початку повів, же його позіція в Раді є формална. Акцентовав, же якраз представителі меншын в тім орґані суть фаховці на дану проблематіку, і він буде сполігати на них. Премєр у своїм вступнім  приговорі незабыв припомянути і то, же 27-го януара в 1995-ім році  в тот день Русины на Словакії кодіфіковали свій язык. Джерело фотоґрафії: Facebook/ЛЕМ.ФМ (ЛЕМ.ФМ, Пкф)