Словацька презідентка Зузана Чапутова сі будучій віторок в Берлінї перебере Шварцкопфову европску цїну. Достала ю за одвагу поставити ся орґанізованому злочіну, за права меншын а головно Ромів а за еколоґічно утримательну будучность, увела в ознамлїню Шварцкопфова надація Молода Европа, інформує о тім TASR. ,,Цїлїй Европі давать надїю, же будучность толеранції, утримательности і сполоченства є можна,“ увела надація в одоводнїню. ,,Єй бой проти корупції указує, же єствує алтернатіва ку скорумпованій і авторітатівній елітї. Стала ся взором в цїлїм реґіонї а опозічны гнутя по цїлїм реґіонї здобыли нову силу.“ Цїну Чапутовій удїлили іщі в роцї 2021, але про пандемію ковіду одовздаваня одложыли аж на тот рік.

(TASR, Шутіова)