Словацькый презідент Петер Пеллеґріні у віторок стрітив ся з презідентом Чеськой репубклікы Петром Павлом в Празі, де пришов на святочный концерт Державной філгармонії Кошыці. Тот одбыв ся при нагоді святковань юбілеїв народжіня бывшого чехословацького презідента Томаша Ґаріка Масарика, і словацького політіка а діпломата Мілана Растіслава Штефаніка. Пеллеґріні пак стрітив ся і з Андрейом Бабішом, котрый быв по перемозі з його рухом ANO в октобровых парламентных вольбах повіреный презідентом Павлом зоставліньом новой влады. Пеллеґріні заґратуловав Бабішові ку перемозі, і потвердив інтерес Словакії продовжовати у форматі сполочных засідань влад. Презідент Пеллеґріні вірить, же по выменованю нового владного кабінету буде захована традіція, подля котрой перша загранічна навщіва чеського премєра прямує на Словакію.

(Медвідь, TASR)