Презідент Словацькой републікы Петер Пеллеґріні прияв у понедільок пополідне в Презідентьскім палаці председу словацькой влады Роберта Фіца на його жадость. Вєдно конзултовали актуалну політічну сітуацію і можливости їй рішіня. В понедільок мав скінчіти ултіматум, котрый дав премєр партнерам з партій Hlas-SD і SNS, жебы вырішыли сітуацію з людми, котры од них одышли і принесли рішіня на обновліня владной векшыны в парламенті. В опачнім припаді премєр декларовав, же передложыть презідентови свої пропозіції на зміны у владнім кабінеті. Дополідне на Уряді влады засідала коалічна рада. Председа SNS Андрей Данко пополідне інформовав, же про вырішіня крізы дав ку діспозіції премєрови вшыткы посады, котры має у владі його партія. Председа партії Hlas-SD Матуш Шутай Ешток вчера повів, же його партія зробить вшытко, жебы сучасна влада вытримала.

(Медвідь, TASR)