Міністерство обраны (МО) СР евідує 8616 жыючіх войновых ветеранів, причім 25 з них боёвало в другій світовій войнї. TASR о тім інформовала говоркыня МО СР Мартіна Коваль Какащікова. Ґенералный директор Секції людьскых здроїв МО СР Мартін Якал приближыв, же од року 2004 признав резорт обраны поставлїня войнового ветерана цїлково 10.160 особам. Сучасно МО СР евідує 196 участників народного боя за ослободжіня. Днесь сі верейность припоминать 104. юбілей скончіня першой світовой войны, котрый є зарівно і Меджінародным днём войновых ветеранів. ,,Вшыткым ветеранім, ці уж войновым або новодобым, належыть наша невысловна подяка за їх службу власти в менї ідеалів слободы, гуманізму і демокрації,“ выголосив міністер обраны СР Ярослав Надь (OĽANO). Памятати бы ся подля нёго мало і на павшых а уж помершых героїв.

(TASR, Шутіова)