Міністерство школства, наукы, баданя і шпорту СР ся мінить на Міністерство школства, баданя, розвитку і молодежі СР. В тім повязаню у четверь влада схвалила выменованя до функції нового штатного таёмника Йана Грінка. Веновати ся буде областям молодежі, інклузії і іновації.  З резорту увели, же цїлём приданя штатного таёмника є вытворити здравше і підпорнїше едукачне середовище на Словакії в реакції на їх розшырены цїлї. Резорт ся од 1. фебруара 2024 кличе Міністерство школства, баданя, розвитку і молодежі СР. ,,Тот крок сіґналізує розшырїня напряміня міністерства з підвышеным акцентом на молодеж, душевне здравя і іновації у едукації,“ доповнили з резорту.

(TASR, Шутіова)