Події ведучі ку конечному паджіню комуністічного режіму в Чеськословеньскій соціалiстичній републіці (ЧССР) зачали бруталным засaгом порядковых сил против доволеній штуденьтскій демонштрації в Празі. Демонштрація і поліцайный засaг зо 17-го новембра 1989-го р. вели к подіям знамым як Ніжна револуція. Од року 2001 собі Словакія припоминать події, од котрых  днесь минуло 36 років, як штатне свято – День боя за слободу і демокрацію. В тім році уж не буде дньом робочого покоя. Зрушіня 17-го новембра як дня робочого покоя є частьов консолідачного пакунка наряджінь, котрый Народна рада Словацькой републикы схвалила 24-го септембра 2025-го р. Тот день є і Меджінародным дньом штудентства, котрый ся звяже к подіям з 28-го октобра 1939-го р., кідь ся одбывала демонштрація штудентів к 21-му вырочу взнику першой Чеськословеньской републикы (ЧСР). Тота ся рівночасно стала і протестом проти націстічной окупаціі Чех, Моравы і Слезка. На мітінґу быв забитый пекаренькый учень Вацлав Седлачек і тяжко раненый штудент медиціны Ян Оплетал, котрый на пораніня вмер 11-го новембра. О шість днів пізніше, 17-го новембра, приказав рішськый протекторат закрытя чеськых высокых школ. Од року 1941 собі світова публіка припоминать 17-ый новембер як Меджінародный день штудентства. (TASR, Пкф)