Презідентка Зузана Чапутова одыйшла днесь на штатну навщіву Канады. В Оттаві ся стрітне з канадьскым премєрьом Йустіном Трудеауном. В найближшы дні абсолвує і робочу драгу до США. Чапутову позвала до Канады єй ґенерална ґувернерка Мари Сімонова. Послідні  раз ся офіціална навщіва словацькой главы штату  в Канаді одбыла перед веце як 20 роками. По офіціалній навщіві Канады буде проґрам презіденткы продовжувати драгов до США. У четверь, 1-го фебруара, ся пересуне до Сан Францісца, де ся стрітне зо словацькыма професіоналми і одборниками, котры ушпішно діють в США і суть обєднаны в орґанізації  Slovak Pro. На теріторії Stanford Research Institute отворить презідентка словацько-америцьке подникательске форум заміряне на іновацію і зелену транзіцію, выужытя умелой інтеліґенції і діґіталных рішень, як і біотехнолоґії. Робоча драга Чапутовой в США кулмінує в неділю навщівов Піттсбурґгу, котрый є повязаный з історійов взнику Чеськословеньской републикы. (TASR, Pkf)