Школованіша Словакія, модернізація демокрації, незалежна поліція, но і зліпшіня стану словацького здравотницьтва. То лем дакотры з пріоріт, на котры бы ся хотіла мімопарламентна партія Spolu – občianska demokracia заміряти, кебы была в будучій владі. Десять основных пріоріт представили їй членове в понедільок на пресконференції в Братіславі. „Вступуєме до остатньой фазы їднань із партійов Progresívne Slovensko о тім, як буде вызерати наша сполочна понука воличам. Єдночасно сьме закінчіли нашу проґрамову роботу і хотіли сьме вам представити, як і де хочеме Словакію дістати. О тім, же Словакія собі жадать зміну днесь уж не є жадных похыбностей. Не треба на то баданя общого мніня, старчіть бісідовати з людми на уліці,“ повів председа партії Мірослав Беблавый. О пріорітах хоче бісідовати і з нововыникаючов партійов Андрея Кіскы. Ключовы проґрамовы пріоріты обсягують три области. Справедливу Словакію, де належыть наприлклад незалежна поліція, другов є соціална держава збудована на здоровій і солідарній Словакії, котра не забывать на сеніорів, третій пілір є орьєнтованый  на будучность і належыть там наприклад школство, зелена країна ці проевропска загранічна політіка.

(Медвідь, TASR)