Як інформовав Інформачный центер Пряшівской архієпархії, в неділю 16-го марца 2025-го року одбыв ся вызначный момент в духовнім жывоті віруючіх Ґрекокатолицькой парохії Чірч. Высокопресовященый Йона Максим, пряшівскый архієпіскоп і митрополіта в тот день передав парохії, котра є архієпархіалным одпустовым місцьом, Ікону Пресвятой Богородіці з назвов Квіт Нетлінный. Владыка  у своїй проповіді окрім іншого бісідовав о історії зъявлінь, котры одбыли ся в селі Чірч, і припомянув тугу містных віруючіх мати Маріяньску гору і чудотворну ікону Матери Божой, жебы особніше могли учтити єй. Кір Йона далше підкреслив, же Церьков посередництвом іконы оддає почливость Пресвятій Богородіці як тій, котра дає жывот, зато має і імя Квіт Нетлінный. Джерело фотоґрафії: Facebook/ЛЕМ.ФМ. (ЛЕМ.ФМ, Пкф)