В неділю 30-го новембра Высокопреосвященый Йона Максим, ґрекокатолицькый пряшівскый архієпіскоп і митрополіта посвятив у парохії Радвань над Лабірцьом обновленый інтерьєр Храму Успенія Пресвятой Богородіці. Храм, котрый є із 1790-го року і є Народнов културнов памятков, быв пошкодженый при землетрясіню в октобрі 2023-го року, і обновленый в літніх місяцях 2024-го року. Владыка мав і проповідь в русиньскім языку, в котрій повзбудив віруючіх, жебы внутрішні зраніня, гріхы были лічены і выздоровляны в Божім храмі Ісусом Хрістом. Владыка по літурґії навщівив і Центер соціалных служеб. Там поблагословив, повзбудив і потішыв тых, котры із причіны хвороты, высокого віку не могли взяти участь на торжестві в храмі.

(Медвідь, ISPA)