Днесь в Пряшові  одбыли ся похоронны обряды за Теодозійов Латтовов, професіоналной русиньской радіовой редакторкы, журналісткы, писателькы, културно-освітньой діятелькы, котра вмерла 16-го октобра 2025-го  у віці 76 років. Теодозія Латтова была довгы рокы голосом україньского, по політічных змінах у Чехословакії русиньского высыланя в Словацькім радію. Теодозія Латтова по 1989-ім році належала ку тым робітникам радія, котры почали просаджовати право Русинів на своє – русиньске высыланя. Хоць не была то легка путь, русиньске высыланя і окрема русиньска редакція стали наконець реалностьов.  Кедь у 2002-ім році зліквідовали пряшівске радіо, перешла робити до той редакції в Кошыцях. Як в Пряшові, так і в Кошыцях была ведучов тіму редакторів русиньского высыланя, котре вела аж до 2006-го року, коли одышла на пензію. По одході на пензію почала актівно брати участь на орґанізачній роботі в Русиньскій оброді на Словеньску (РОС), але і в іншых русиньскых орґанізаціях. Сама была літературно плодна, писала наприклад приповідкы про діти. Но так само была і при выданю творів іншых писателів. Робота в радію была про Теодозію Латтову ціложывотнов любвов, нелем професійов але і посланьом. Кедь у 2012-ім році почало высылати русиньске інтернетове радіо русин.ФМ, до молодого колектіву, втогды аматерів, залучіла ся і она, а то з великым ентузіазмом. А залучіла ся нелем радами, але і конкретнов роботов, кедьже приготовльовала довгы рокы, покля їй то здоровля дозволило, дакілько релацій, як Історічный календарь, Нашы целебріты, Перлічка ці Припомінка. Так само тексты Теодозії Латтовой, векшынов на історічны темы, выходили і в ґазеті інфо Русин, пізніше НН інфо Русин. Дякуєме, пані Дусьо, за вшытку Вашу хосенну роботу на благо Русинів, котра все была роблена з великым сердцьом. Вічная память! (ЛЕМ.ФМ, Пкф)