В неділю 5-го октобра Ґрекокатолицька церьков на Словакії святковала праздник Памяти чудотворной Клокочівской іконы Пресвятой Богородіці, Покровителькы Земпліна. При тій нагоді Кошыцька єпархія зорґанізовала першу путь пріматорів і старостів до Клокочова ку Покровительці Земпліна. На пути взяло участь майже сто пріматорів і старостів переважно із выходной Словакії. Головным пунктом проґраму была архієрейска літурґія, котру одправляв Высокопреосвященый владыка Кіріл Василь, кошыцькый єпарха, вєдно з ним і емерітный кошыцькый єпарха кір Мілан Хаутур, і священици єпархії. Архієпіскоп Кіріл у проповіді припомянув історію праздника Покровителькы Земпліна, котрый Святішый Престол выголосив своїм декретом 21-го новембра 2020-го року. Были то якраз представителі самосправ нижнього і вышнього Земпліна вєдно із представителями Ґрекокатолицькой, Римокатолицькой і Православной церькви, котры своїм писмом звернули ся до Святішого Престола із жадостьов о выголошіня Клокочівской Богородіці за Покровительку Земпліна.

(Медвідь, TSKE)