Село Малый Липник в окресї Стара Любовня по роцї зась ожыє фолклорным фестівалом Русиньска ватра. В порадю 14. рочник принесе на север Словакії русиньску културу в малебнім середовищу пригранічного села. Інформовав о тім директор подїї Петро Штефаняк. Тройднёва подїя одштартує днесь о 18.00 г а про навщівників окрем головных проґрамовых блоків приготовили і супроводны актівіты. ,,Єднак як перед роком ся буде подїя одбывати на плосї опроти футбалового гріска коло рікы Попрад,“ увів Штефаняк.  Фестівал отворять дїтьскы фолклорны колектівы, по котрых буде наслїдовати концерт з назвов Співы мого роду. Днешнїй проґрам выверхолить концертом русиньской співачкы Іваны Брілловой, Народной музикы Матєя Тополёвского і клавірісту Петра Шарішского. В суботу 12. юла отворить фестівал браны о 14.00 г ґастрофестівалом ,, З русиньской кухнї“ і двома выставами в окремых станох.  ,,На головній сценї понукнеме три фолклорны проґрамы, котры суть уж дакілько років стабілнов частёв фестівалу,“ доповнив Штефаняк.  Орґанізаторы приготовили проґрам і про дїтьскых навщівників, школу танця ці бесіду о традічнім русиньскім облечіню, але і выставу репродукції дїл Енді Варгола.Выверхолїнём фестівалу буде уж традічно палїня ватры. Фестівал в недїлю (13. 7.) дополідне выверхолить святов літурґіёв в церковнославяньскім языку в містнім Храмі св. Даміана і Козму.

(TASR, Шутіова)