Днесь з початком о 10.00 год зачало засіданя посланців Пряшівского самосправного края (ПСК). На проґрамі мали 26 пунктів з котрых найвеце дотуляли ся фінанцованя проєктів в області школства і културы тых інштітуцій, котры суть в компетенції самосправного края. Такым способом посланці крайской самосправы окрім іншого одобрили вступ културных орґанізації – Любовняньскому музею – граду в Старій Любовні, Крайскій бібліотеці П.О.Гвіездослава в Пряшові, Крайскій Ґалерії в Пряшові, Вышньоземплиньскій бібліотеці у Вранові над Топльов, Крайскому музею в Пряшові – до проєктів в рамках вызв Міністерства културы СР і Фонду на підпору уміня. ПСК дале одобрило вступ до проєкту ‟Реконштрукція Музея модерного уміня Андіго Варгола в Меджілабірцях, ці вступ Вышньоземплиньской бібліотекы у Вранові над Топльов до проєкту ‟Реконштрукція і модернізація мултімедіалного будинку културного центра у Вранові над Топльов, Горноземплиньска бібліотека. ПСК залучіть  ся тыж до проєкту з назвом ‟Дві країны, єдны Татры‟, ці до проєкту фінанцованого з Проґраму Інтерреґ Польща – Словакія 2021- 2027 ‟Спознай пригранича – з наклонностьов, здраво, на біціґлі‟, де іде о елімінацію безпечностных різік на дразі Тарнов – Ґаболтів. (TASR, Pkf)