По шестьох роках роботы новый філм Потопа режісера Мартіна Ґонды дочекав ся міцного меджінародного штарту. По премєрі в Арґентіні іде на фестівал до Індії. Пак із ним творцьове прийдуть на выходну Словакію, де выникнув, і де окрем премєр будуть і діскусії. В посліднім новембровім тыждню одбуде ся серія премєр в Кошыцях (26.11.) Снині (27.11), Гуменнім (28.11.), 29-го новембра у Свіднику і Нехваль Полянці а наконець 30-го новембра в Пряшові. Вчера о тім інформовали творцьове філму. Філм потопа є першым постсоціалістічным граным філмом, котрый розповідать історію высельованя при будованю водного резервоару Старина. „Філм выроснув із оточіня русиньской комуніты, і наточіли сьме го по русиньскы. Чутливым способом припоминать судьбы людей, котрых села мусили уступити будованю водного резервоару Старина, а подобны історії знають родины по цілій Словакії – коло Ліптовской Мары, Оравской гати ці іншых водных діл. То наш способ, як їм вернути голос і память,“ бісідує продуцентка філму Катарина Кырначова. Потопа мала світову премєру в Арґентіні, продовжує свою путь на найвекшый філмовый фестівал в Індії, і в словацькых кінах буде од 4-го децембра того року. Джерело фотоґрафії: ЛЕМ.ФМ/Facebook. (ЛЕМ.ФМ, Пкф)