Святочным одовзданём проєктовой документації ку выставбі першого модулового дому у Великім Шарішу в середу Уряд уповномоченого влады СР про ромскы комуніты спустив проєкт З хатырчі до дому. Документацію перевзяв пріматор міста Великый Шаріш Віліам Калл. Уряд хоче проєктом зачати мінити осады на достойны обыстя а дати людём жыючім в ґенерачній худобі шанцу на лїпшый жывот. Першый модуловый дім бы мав быти поставленый в першій половинї будучого рока. ,,Думам сі, же то є іноватівный проєкт, котрый нам ускорить цїлый процес, як можеме своїм способом одстранёвати осады, але і хатырчі, де, як шыткы добрї знаме, не суть достойны условія на то, жебы могла ромска комуніта бывати. З хатырчі до дому є проєкт, котрый є барз скорый а не так дорогый,“ увів уповномоченый влады СР про ромскы комуніты Александер Дашко. В рамках проєкту буде подля ёго слов такзвана боніфікація, домы люде не достануть задарьмо.

(TASR, Шутіова)