Уставный суд СР зрушыв вердікт Найвысшого справного суду СР о неплатности волеб старосту в селі Громош в окресі Стара Любовня, котры ся одбыли в минулім року в октобрі. Вердіктом Найвысшого справного суду дошло подля Уставного суду СР к порушіню основных прав Мароша Кочіша, котрый у вольбах здобыв найвеце голосів. Вольбы старосту напав справнов жалобов неуспішный кандідат Франтішек Мойхер. Арґументовав, же членове волебной комісії неголосували меджі  собов, котры з них выконають вольбу через переносну волебну скриньку. Контровав тыж нарушіньом процесу волеб і порушіньом волебного мораторія, кідь протікандідат мав быти в часі голосуваня, по його скінчіню і в часі зрахуваня голосів повторюючо притомный у волебній містьтности. Уставный суд по уставній жалобі Кочіша тот вердікт зрушыв. В згорнутю Уставный суд конштатував, же найджены волебны недостаткы свойов інтензітов не суть способны выкликати похыбованя о тім, же выслідкы волеб выражають проявлену реалну волю воличів і же в нападженім конаню небыв релевантным способом спохыбнене таке чісло голосів, котре бы могло звернути уж выголосены выслідкы голосів. У вольбах в Громоші здобыв Кочіш  (Smer-SD, Hlas-SD, SNS, KSS) 158 голосів і Мойхер (SaS, KDH) 150 голосів. (TASR, Pkf)