У французьскім місті Ніс почала в понедільок Конференція Орґанізації зъєдиненых народів о океанах. З приговорами на початку выступили французьскый презідент Еммануел Макрон і ґенералный секретарь ОЗН Антоніо Ґуттереш. Обидвоми вызвали на охрану світовых вод і морьского дна. Ґуттереш у приговорі апеловав, жебы „глубоке море не стало дикым Западом“. Бразільскый презідент Луіз Інаціо Лула да Сілва думать, же огрожіньом про океаны є „унілатералізм“. На конференції очекує ся досягненя проґресу у вопросі ратіфікації меджінародного договору о охрані одкрытого моря, котрый мусить ратіфіковати 60 країн, жебы почав діяти. Дотеперь то зробило 32 держав.

(Медвідь, TASR)